«Жалайыр Орақты батыр» атты тарихи кітап жарыққа шықты. Кітаптың авторы Ораз-Мұхаммед Исмаилов – жазушы, тарихшы, журналист, қоғам қайраткері, Қазақстан Жазушылар одағының мүшесі, 30 кітаптың авторы, Қазақ Гуманитарлық Заң университетінің «Құрметті профессоры», Алматы облысының «Құрметті азаматы». Ол кісі Иран, Ирак, Әзірбайжан, Ұлыбритания, Ресей, Қытай, Пәкістан және Үндістан елдерінің мұрағаттарынан қазақ тарихына қатысты беймәлім беттері мен құпия мәліметтерді зерттеуге өз өмірінің көп жылдарын арнаған.
Қазақ тарихы негізінен қырықтан астам түрік рулары мен тайпалардың тарихынан құралады. Сондықтан қазақ тарихын білу үшін ру-тайпалардың тарихын зерттеу қажет. Бұл кітап Қазақ хандығының қалыптасу кезеңіндегі атқарған еңбегімен даңқы шыққан, жалайыр руының біртуар тарихи тұлғасы Орақты батырға (1420 – 1501жж.) арналып отыр. Кітап негізгі үш бөлімінен тұрады: 1.Жалайыр Орақты батырдың шежіресі; 2.Әлем тарихындағы жалайырлар (тарихи зерттеу); 3. Орақты батыр (тарихи хикаят).
Бұл кітап - қазақ және әлем тарихының тылсым сырлары мен құпияларын ашу жолындағы шын мәніндегі алтын кілт іспетті. Осы еңбек қазақ халқының шынайы тарихын, алтын тамырын танып-білгісі келетіндерге, сонымен қатар әлем тарихының құпия беттерін ашқысы келетін көпшілік қауымға арналған.
Кітап - қазақ халқының ұлы тарихының белгісіз беттерін қайта қалпына келтіруге және қазақ халқының танымал тұлғаларының өмір деректері арқылы жас ұрпақтың рухын көтеріп, өз халқына мақтаныш пен сүйіспеншілік сезімін оятып, оларды патриоттық тұрғыда тәрбиелеу мақсатында жазылды.